സുരക്ഷാകാരണങ്ങളാല്‍ ഇന്ത്യന്‍ പ്രീമിയര്‍ ലീഗ് മല്‍സരങ്ങള്‍ ഇന്ത്യക്കു പുറത്തു നടത്താന്‍ തീരുമാനിച്ചതിനെ തുടര്‍ന്ന് അതുപോലെ ജനം കൂടാന്‍ സാധ്യതയുള്ള മറ്റ് ആഘോഷപരിപാടികളും മല്‍സരങ്ങളും കൂടുതല്‍ സുരക്ഷിതമായ ഇന്ത്യക്കു പുറത്തുള്ള മേഖലകളിലേക്ക് മാറ്റാന്‍ തീരുമാനിച്ചു. തീവ്രവാദഭീഷണിയുടെ പശ്ചാത്തലത്തിലാണ് ഈ നീക്കം. ഇതനുസരിച്ച് ലോകപ്രസിദ്ധമായ തൃശൂര്‍ പൂരം വരുന്ന വര്‍ഷം മുതല്‍ ബ്രസീലിലെ റിയോ ഡി ജനീറോയില്‍ നടത്തും.. കാര്യം ബ്രസീലിലാണ് സംഗതി നടത്തുന്നതെങ്കിലും തൃശൂര്‍ പൂരം എന്ന പേര് മാറ്റില്ല. അതാണ് നമ്മുടെ രാജ്യസ്നേഹം.
അര്‍ത്തുങ്കല്‍ പള്ളി പെരുന്നാള്‍ ബൊളീവിയയിലെ ഒറൂറോയിലും എടത്വ പള്ളി പെരുന്നാള്‍ ബെല്‍ജിയത്തിലെ ബിന്‍ജെയിലും അരുവിത്തുറ പള്ളി പെരുന്നാള്‍ ബോസ്നിയയിലെ ലെജ്ബുസ്കിയിലും മണര്‍കാട് പള്ളി പെരുന്നാള്‍ ക്രൊയേഷ്യയിലെ റിജേകയിലും നടത്താനാണ് തീരുമാനം. മാരാമണ്‍ കണ്‍വന്‍ഷന്‍ ചൈനയിലെ ബെയ്ജിങ്ങിലും ആലുവാമണപ്പുറത്തെ ശിവരാത്രി ആഘോഷങ്ങള്‍ സൈപ്രസിലെ ബീച്ചിലേക്കും മാറ്റും. ഇവിടെയൊക്കെ ശക്തമായ സുരക്ഷ ലഭ്യമാകുമെന്നതിനാലാണ് യാതൊരു സുരക്ഷയുമില്ലാത്ത ഇന്ത്യയില്‍ നിന്നും സംഗതികള്‍ മാറ്റുന്നത്.
മലയാറ്റൂര്‍ തീര്‍ത്ഥാടനം ആല്‍പ്സ് പര്‍വതനിരകളിലേക്കും ശബരിമല തീര്‍ത്ഥാടനം റോക്കി പര്‍വതത്തിലേക്കും മാറ്റുന്ന കാര്യവും പരിഗണനയിലുണ്ട്. ചെട്ടിക്കുളങ്ങര ഭരണി, ആറ്റുകാല്‍ പൊങ്കാല, കൊടുങ്ങല്ലൂര്‍ ഭരണി എന്നിവയ്ക്കു വേണ്ടി ടാന്‍സാനിയയിലെയും ചെക്കോസ്ലോവോക്യയിലെയും ചെക്ക് റിപ്പബ്ളിക്കിലെയും അനുയോജ്യമായ സ്ഥലങ്ങള്‍ അന്വേഷിച്ചു വരുന്നു.
കോണ്‍ഗ്രസ് ഹൈക്കമാന്‍ഡ് യോഗങ്ങള്‍ ഇറ്റലിയിലെ മിലാനിലേക്കും സിപിഎം പിബി യോഗങ്ങള്‍ പോളണ്ടിലേക്കും സംസ്ഥാന കമ്മിറ്റി യോഗങ്ങള്‍ ചൈനയിലേക്കും ബിജെപി യോഗങ്ങള്‍ അമേരിക്കയിലെ സുരക്ഷിതമായ ഏതെങ്കിലും സ്ഥലത്തേക്കും മാറ്റുമെന്നറിയുന്നു.
ആലപ്പുഴ നെഹ്റു ട്രോഫി വള്ളംകളി ടൈഗ്രിസ് നദിയിലേക്കും ആറന്മുള ഉതൃട്ടാതി വള്ളംകളി കിഴക്കേ ആമസോണ്‍ നദിയിലേക്കും മാറ്റിയിട്ടുണ്ട്. കോഴിക്കോട് കോരപ്പുഴയില്‍ തിരുവോണത്തോടനുബന്ധിച്ചു നടത്തുന്ന ജലോല്‍സവം ഇനി മുതല്‍ നയാഗ്രയുടെ ഒഴുക്കു കുറഞ്ഞ ഭാഗത്തു നടത്തും. വള്ളങ്ങള്‍ മുങ്ങിപ്പോവുകയോ ചുഴിയില്‍ പെട്ട് തുഴച്ചില്‍കാര്‍ വെള്ളംകുടിച്ചു ചാവുകയോ അല്ലാതെ ആര്‍ക്കും ഒരു സുരക്ഷാഭീഷണിയും ഉണ്ടാവില്ല എന്നതാണ് ഇതിന്റെ പ്രധാന ആകര്‍ഷണം. കാക്കൂര്‍ കാളവയല്‍ ഉല്‍സവം ഇനി മുതല്‍ ബെര്‍ലിനിലാണ് നടക്കുക.
വല്ലാര്‍പാടം പള്ളി തിരുനാള്‍ സൈപ്രസിലെ ലിമാസോളിലേക്കു മാറ്റുമ്പോള്‍ മള്ളിയൂര്‍ വിനായക ചതുര്‍ത്ഥി ഓസ്ട്രിയയിലെ വിയന്നയിില്‍ നടത്തും. എരുമേലി പേട്ടതുള്ളല്‍ ഇറ്റലിയിലെ റോമിലേക്കും തൊടുപുഴയില്‍ പിജെ ജോസഫ് നടത്തുന്ന ഗജമേള തുര്‍ക്കിയിലെ ഇസ്താംബൂളിലേക്കും മാറ്റുമെന്നാണ് സൂചന. കോഴിക്കോട് കൊടുവള്ളിയില്‍ നടക്കുന്ന കൊയപ്പ ഫുട്ബോള്‍ റയല്‍ മഡ്രിഡിന്റെ സാന്റിയാഗോ ബെര്‍ണബ്യൂ സ്റ്റേഡിയത്തിലേക്കു മാറ്റും.
കണ്ണൂര്‍ കളരിവാതുക്കല്‍ തെയ്യം, മാവിലാക്കാവ് അടിയുല്‍സവം എന്നിവ സ്വിറ്റ്സര്‍ലന്‍ഡിലെ സൂറികിലേക്കും ഓച്ചിറക്കളി ഉല്‍സവം ഓര്‍ലാന്‍ഡോയിലേക്കും തിരുവനന്തപുരം ബീമാപള്ളി ചന്ദനക്കുടം സൌദി അറേബ്യയിലെ റിയാദിലേക്കും മാറ്റണമെന്നും നിര്‍ദേശമുണ്ട്.
കൊച്ചിന്‍ കാര്‍ണിവല്‍ ഇനി മുതല്‍ ലണ്ടനിലെ നോട്ടിങ് ഹില്ലിലായിരിക്കും നടക്കുക. മലബാര്‍ മഹോല്‍സവം ഫിജിയിലും ഇടുക്കിയിലെ മര്‍ച്ചന്റ് അസോസിയേഷന്‍ നടത്തുന്ന മുരിക്കാശേരി ഫെസ്റ്റിവല്‍ ഹംഗറിയിലെ മൊഹാസിലും പാലാ പള്ളിയില്‍ നടക്കുന്ന രാക്കുളി തിരുനാള്‍ ദക്ഷിണാഫ്രിക്കയിലെ ജൊഹാനസ്ബര്‍ഗിലും നടക്കും. ദുഖവെള്ളിയാഴ്ചകളില്‍ വാഗമണ്‍ കുരിശുമലയിലേക്കു നടത്താറുള്ള കുരിശിന്റെ വഴി സുരക്ഷാകാരണങ്ങളാല്‍ ഇനി മുതല്‍ സൈബീരിയന്‍ കാടുകളിലായിരിക്കും നടത്തുക. ഡിസംബര്‍ ജനുവരി മാസങ്ങളില്‍ നടത്തുന്ന കേരളാ ഷോപ്പിങ് ഫെസ്റ്റിവല്‍ അടുത്ത വര്‍ഷം മുതല്‍ അഫ്ഗാനിസ്ഥാനില്‍ നടത്തും.
തിരുവന്തപുരം കുതിരമാളിക പാലസില്‍ നടത്താറുള്ള സ്വാതി സംഗീത ഉല്‍സവം ഇനി മുതല്‍ ശ്രീലങ്കയിലെ മുല്ലത്തീവിലാകും നടക്കുക. ഉത്രാളിക്കാവ് ഉല്‍സവം പറ്റിയാല്‍ ഉഗാണ്ടയിലെവിയെങ്കിലും നടത്താനും ആലോചനയുണ്ട്. ഭരണങ്ങാനം തീര്‍ത്ഥാടനം ഇനി മുതല്‍ റഷ്യയിലെ മോസ്കോയിലും കല്‍പാത്തി രഥോല്‍സവം നേപ്പാളിലെ പൊക്രയിലും നീലംപേരൂര്‍ പടയണി ക്യാനഡയിലെ ടൊറന്റോയിലും നടത്തുമെന്നുമാണ് സൂചനകള്‍.
Hi check this
മറുപടിഇല്ലാതാക്കൂhttp://www.berlytharangal.com/