ഫ്രീ പ്രസ് കാന്താരി

First Published in Free Press, July 2004

പാചകക്കുറിപ്പ്

ഒരു പ്രത്യേക കേരള വിഭവമാണ് ഇക്കുറി കാന്താരിയിലൂടെ പരിചയപ്പെടുത്തുന്നത്. ഈ വിഭവം തയാറാക്കിയത് പ്രശസ്ത പാചക വിദഗ്ധയായ ചെണ്ടപ്പറമ്പില്‍ മിസിസ് വി.എം.എസ്.

തൊഴില്‍ (ഇല്ലായ്മ) അവിയല്‍ (കേരളാ സ്‌പെഷല്‍)

ആവശ്യമായ ചേരുവകള്‍:

1. ഏതെങ്കിലും വിഷയത്തില്‍ ബിരുദം - 50 ശതമാനം മാര്‍ക്ക് നിര്‍ബന്ധം

2. ബി.എഡ്., ജേണലിസം, ബിസിനസ് മാനേജ്‌മെന്റ്, കമ്പ്യൂട്ടര്‍ തുടങ്ങിയവയിലെ ഡിപ്ലോമ - ആവശ്യത്തിനനുസരിച്ച് (ലഭ്യമല്ലെങ്കില്‍ ലഭ്യമായതെന്തും ഉപയോഗിക്കാം)

3. പ്രവൃത്തി പരിചയം - രണ്ടു വര്‍ഷം

(ഒന്നും രണ്ടും മൂന്നും ചേരുവകള്‍ക്ക് കുറഞ്ഞത് രണ്ട് വര്‍ഷം പഴക്കം വേണം)

4. പൊതുവിജ്ഞാനം - അഞ്ചു കപ്പ്

5. മെന്റല്‍ എബിലിറ്റി - മണിക്കൂറില്‍ നൂറെന്ന കണക്കില്‍ ചെറുതായി അരിഞ്ഞത് മൂന്നു കപ്പ്

6. കണക്ക് - പി.എസ്.സി. ചോദ്യപേപ്പര്‍ വായിച്ച് മനസിലാക്കാന്‍ ആവശ്യമായത്

7. ഭാഗ്യം - സ്വാദിന്

8. വിശദമായ ബയോഡാറ്റ - ഒരു കറിക്ക് ഒന്നുവച്ച് (പോസ്റ്റോഫീസില്‍ നിന്ന് പത്തു രൂപക്ക് ലഭിക്കുന്ന അപേക്ഷാഫോമായാല്‍ നല്ലത്.)

തയാറാക്കേണ്ട വിധം: ആദ്യ മൂന്ന് ചേരുവകള്‍ ഒരുമിച്ച് വെള്ളം ചേര്‍ക്കാതെ പുഴുങ്ങുക. പുഴുങ്ങിയ ചേരുവകള്‍ എട്ടാമത്തെ ചേരുവയില്‍ ഇട്ട് ബ്രൗണ്‍ കളറാവുന്നതുവരെ വറക്കുക (മൂന്നുവര്‍ഷം വരെ സമയമെടുക്കാം). ഇതിലേക്ക് നാലു മുതല്‍ ഏഴു വരെ ചേരുവകള്‍ ചേര്‍ത്ത് ഒരു മണിക്കൂര്‍ നേരം പ്രഷര്‍ പേപ്പറില്‍ വേവിച്ചെടുക്കുക. മൂന്നു കൊല്ലം വരെ പ്രഷര്‍ കളയരുത്.

പുറത്തെടുത്ത് നല്ല വൃത്തിയായി കഴുകിയ പ്ലേറ്റില്‍ എടുത്ത് വക്കുക. അല്പം കൈക്കൂലി മുകളില്‍ വിതറിയാല്‍ കഴിക്കുവാന്‍ സ്വാദ് കൂടും.

(ഇതേ വിഭവം നോണ്‍-വെജിറ്റേറിയനായും ഉണ്ടാക്കാം. ഇതിനായി ഒന്നാമത്തെ ചേരുവ ബിരുദാനന്തരബിരുദമോ പ്രൊഫഷണല്‍ ബിരുദമോ ആയിരിക്കണമെന്നുമാത്രം.)